Përmes aeroportit të Shkupit dhe Ohrit për gjashtë muaj kanë udhëtuar mbi një milionë udhëtarë

Maqedonia

Përmes aeroportit të Shkupit dhe Ohrit për gjashtë muaj kanë udhëtuar mbi një milionë udhëtarë

Më: 10 korrik 2018 Në ora: 18:30
Ilustrim

Nëpërmjet Aeroportit Ndërkombëtar të Shkupit dhe Aeroportit të Ohrit “Shën Apostol Pali”, në gjashtë muajt e parë të vitit, janë transportuar 1.041.583 udhëtarë, që paraqet rritje vjetore prej 21 për qind, në krahasim me gjysmën e parë të vitit të kaluar.

Sipas “TAV Maqedoni” – koncesioner i aeroporteve në Shkup dhe në Ohër, në periudhën e njëjtë nga janari deri në qershor të këtij viti numri i fluturimeve në të dy aeroportet e Maqedonisë ka arritur 9.033, me rritje vjetore prej 16 për qind.

“Përderisa aeroportet evropiane kanë rritje mesatare në numrin e udhëtarëve prej 6,1 për qind në vitin 2018, TAV vazhdon të shënojë norma të larta dyshifrore në qarkullimin e pasagjerëve në aeroportet e Maqedonisë. Ky trend pozitiv në rritjen e qarkullimit ajror, e konfirmon potencialin e madh të cilin e ka tregu i aviacionit në Maqedoni. Do të vazhdojmë të bëjmë përpjekje maksimale për zhvillimin e aeroporteve në Shkup dhe në Ohër, me tërheqjen e linjave të reja ajrore dhe zgjerimin e rrjetit të destinacioneve, në bashkëpunim me të gjitha institucionet kompetente shtetërore”, deklaroi Alper Ersoj, drejtor i përgjithshëm i TAV Maqedoni.

Siç potencojnë nga kompania, rritja e qarkullimit të udhëtarëve me 21 për qind, që TAV Maqedoni e regjistroi nga janari deri në qershor të këtij viti, e tejkalon edhe rritjen mesatare të aeroporteve të vendeve të cilat nuk janë anëtare të BE-së, e cila është 12,5 për qind në pjesën e parë të vitit 2018.

Destinacionet më të shpeshta sipas qarkullimit të udhëtarëve në gjashtë muajt e parë në Aeroportin Ndërkombëtar të Shkupit janë: Stambolli, Cyrihu, Bazeli, Vjena, Malmo dhe Bratisllava.

Sot mund të lexoni Shfletoni kopertinat