Gjermania vazhdon të mos i njohë lejet e vozitjes së qytetarëve të Maqedonisë. Nga kjo më shumë e pësojnë ata që jetojnë dhe punojnë në federatën gjermane. Një prej tyre është edhe ky i ri nga Shkupi që jeton në Shtutgart. Ai na tha se patentën e shoferit që e ka marrë në Maqedoni ka qenë e vlefshme vetëm në 6 muajt e parë të qëndrimit të tij në Gjermani.
“Tani unë kam probleme në punë për shkak të vozitjes, sepse tani nuk kam të drejtë të vozis dhe tani jam dy nivele më poshtë, në krahasim me sa kam qenë në fillim kur kam filluar të punoj”, tha Miftar Alimi.
Që të mos përballen me gjoba dhe pengesa në kryerjen e punëve të tyre, Alimi na tregoi se shumë qytetarë të Maqedonisë marrin patentën e shoferit të shtetit gjerman dhe kanë hequr dorë nga pritja për njohje reciproke të lejeve.
Peticioni që u hap për t’i gjetur zgjidhje këtij problemi, përfundoi më 6 prill. U mblodhën 42 mijë nënshkrime. Nismëtarët e këtij peticioni tani kërkojnë takim me përfaqësues të MPB-së për të kërkuar përgjigje se ku ka ngecur problemi.
“Jemi dëshmitar se me muaj na thuhet sot-nesër, sot-nesër. Kjo sot-nesër ka çoroditur shumë njerëz, që s’dinë çfarë të bëjnë, të presin apo ta rimarrin patentën këtu.
Çështja është serioze dhe duam të merret seriozisht, sepse çdo ditë e këtyre njerëzve është e vlefshme. Duam të dimë se deri ku është. Aq më tepër që deklaratat e institucioneve gjermane janë shumë më të mbyllura për dallim nga deklaratat optimiste që i dëgjojmë nga ana maqedonase”, tha Aleksandar Ivanov, nismëtar, banues në Gjermani.
Për disa muaj me radhë, që kur TV21 interesohet për këtë çështje, përgjigja e vetme që merr nga Ministria e Punëve të Brendshme është se procesi është në fazë finale. Sërish nga MPB kërkuam përgjigje se kur pritet të firmoset marrëveshja për njohje të dyanshme të patentave të shoferit.
“Shumë shpejt e presim nënshkrimin e kësaj marrëveshjeje dhe publiku do të jetë i informuar në mënyrë adekuate për këtë”, thanë nga Ministria e Punëve të Brendshme.
Burime anonime i thanë TV21 se janë zgjidhur të gjitha çështjet për njohje reciproke të patentës së shoferit. Tani vetëm pritet caktimi i një date për nënshkrimin e marrëveshjes nga përfaqësuesit e Maqedonisë dhe Gjermanisë. Sipas këtij burimi me shumë gjasa nënshkrimi do të ndodhë në fillim të qershorit.
Problemi me njohjen e patentave të shoferit të Maqedonisë në Gjermani zgjat mbi 10 vite. Deri më tani, arsyeja që MPB ka dhënë për mosnjohjen janë çështje teknike që lidhen me kontrollin mjekësor të shoferëve, gjë që kanë penguar njohjen e dyanshme të patentave të shoferit.
