Prokuroria Speciale e Maqedonisë kërkoi aktvendim dënues për Nikolla Gruevskin dhe Gjoko Popovskin në rastin Tanku.
Specialja në fjalët përmbyllëse tha se dëshirat personale të ish-kryeministrit, në lidhje me Mercedesin e blinduar luksoz, janë plotësuar përmes prokurimit të realizuar nga MPB-ja.
Nga Specialja theksuan se para se ta blejnë Mercedesin e shtrenjtë ka pasur procedurë që të blihet një automobil i përdorur, i blinduar, por policia ka ndryshuar mendjen.
Avokatët e të pandehurve, megjithatë kërkuan aktvendim lirimi për Gruevskin dhe Popovskin. Procedura për Gordana Jankullovskën është ndarë për shkak të shtatzënisë së rrezikshme.
Ish-kryeministri rrezikon dënim me burg prej 1-3 vjet, i cili mund të jetë edhe me kusht, ndërsa ish-ndihmës ministri i punëve të brendshme, Gjoko Popovski, ballafaqohet me dënim me burg mbi 5 vjet. Të dy janë akuzuar në lëndën Tanku për prokurimin e mercedesit luksoz në vlerë mbi 600 mijë euro.
