Në Gjykatën Penale sot duhet të mbahet seancë për lëndën e PSP-së “Toplik”, në të cilën dyshohen ish-ministri i Transportit dhe Lidhjeve Mile Jankieski edhe pesë persona të tjerë për shitje të një parcele ndërtimore në Sopishte të Shkupit.
Në seancën e fundit avokatët para fillimit të debatit kryesor kërkuan përjashtim të ekspertizës së dokumentacionit dëshmues të përpiluar nga PPS-ja, sepse ekspert për momentin është drejtori i Agjencisë për Kadastra të Patundshmërive, ndërsa vajza e tij punon në PPS. Sipas tyre ekspertiza është subjektive.
Prokurorët e PPS-së vlerësojnë se kërkesa e mbrojtjes është e pa bazë, për ç’arsye kërkon që Gjykata të mos e pranojë ankesën.
Gjykatësi Osman Shabani tha se Këshilli Gjyqësor do të vendosë në mënyrë shtesë për kërkesën e mbrojtjes dhe se për vendimin, gjegjësisht për atë nëse do të pranohet ekspertiza apo do të emërohet ekspert i ri palët do të marrin njoftim me shkrim.
Në “Toplik” i dyshuari i parë Jankieski, si person udhëheqës në Ministrinë e Transportit dhe Lidhjeve, në kundërshtim me ligjin për furnizime publike ka krijuar komision për ankande publike të cilit i ka urdhëruar të zgjedhë ofrues për blerje dhe disponim me tokë shtetërore për ndërtimin e kompleksit elit Qyteti i Diellit në Sopishte, edhe pse firma nuk i ka plotësuar kushtet për këtë.
Nga dëshmitë e PPS-së, del se për shkak të prishjes së marrëveshjes me faj të Ministrisë, ajo është obliguar në vlerë prej një milionë euro t’i paguajë borxh dhe interesin e mbetur personit juridik “San siti”.