Maqedonia është renditur mes vendeve me transparencë më të keqe buxhetore në botë, kumtoi sot Qendra për Analiza Ekonomike (QAE), duke iu referuar hulumtimit “Buxhet i hapur (OBI) 2017” të Partneritetit Buxhetor Ndërkombëtar (PBN).
Sipas QAE, pas erozionit të disiplinës fiskale dhe keqpërdorimit më të gjerë të Qeverisë paraprake para zgjedhjeve të parakohshme parlamentare kur shteti ishte etiketuar si i “robëruar”, raporti më i madh i pavarur global zbuloi se Qeveria e re e Maqedonisë mund ta përmirësojë transparencën në mënyrë të shpejtë, me pak shpenzime dhe përpjekje.
“Edhe pse është bërë shumë pas ndërrimit të Qeverisë paraprake e cila e ka eroduar disiplinën fiskale dhe transparencën, ende shumë duhet të bëhet. Maqedonia duhet ta përmirësojë Propozim-buxhetin dhe të ofrojë më shumë informata buxhetore, të sigurojë më shumë pjesëmarrje të qytetarëve në procesin buxhetor dhe ta përforcojë kontrollin e buxheteve edhe te ligjdhënësi edhe te revizioni shtetëror”, tha kryetari i QAE -së Marjan Nikollov në konferencën për shtyp.
Sipas tij, Maqedonia është me rezultat zero në vlerësimin e OBI-së për atë nëse Qeveria i mundëson opinionit pjesëmarrje në procesin buxhetor.
“Pa mundësi për pjesëmarrje aktive të qytetarëve, veçanërisht kategorive të margjinalizuara ose të prekura, sistemi buxhetor mund t’u shërbejë vetëm elitave të fuqishme. Qeveria, Kuvendi dhe Enti Shtetëror për Revizion duhet të ndërmarrin masa që të përmirësohet përfshirja e qytetarëve në procesin buxhetor dhe në ciklet buxhetore”, potencon Nikollov.
Kërcënimi potencial për Maqedoninë, shtoi kryetari i QAE-së, është ajo që nuk ka sistem të fuqishëm dhe praktikë të llogaritjes buxhetore për shkak të së cilës janë rrezikuar mundësitë për realizimin e qëllimeve zhvillimore.
“Qeveria duhet ta përmirësojë vëllimin e informatave në dokumentet buxhetore, ndërsa Kuvendi duhet ta rrisë mundësinë për përfshirje të ekspertëve dhe qytetarëve të cilët së bashku me deputetët do t’i diskutojnë raportet e revizionit. Enti Shtetëror për Revizion, sërish, duhet të mundësojë përfshirje më transparente”, nënvizoi Nikollov.
OBI 2017 përfshin 115 vende, ndërsa afati përfundimtar për plotësimin e pyetësorit ishte 31 dhjetori i vitit 2016. Maqedonia merr pjesë në këtë hulumtim nga viti 2008./
