Maqedoni, raporti për sistemin AKMIS akoma nuk ka arritur në Prokurorinë Publike

Maqedonia

Maqedoni, raporti për sistemin AKMIS akoma nuk ka arritur në Prokurorinë Publike

Më: 20 janar 2018 Në ora: 10:27
Ilustrim

Si ka ndodhur që raporti për funksionimin e sistemit AKMIS-it të humbet, në relacion jo më të gjatë se një kilometër nga Ministria e drejtësisë e deri te Prokuroria publike, askush nuk e di.

Pas më shumë se një muaji, pasi që grupi punues i Ministrisë së Drejtësisë prezantoi se si është gjendja në disa gjykata të Maqedonisë dhe përderisa opinioni pret përgjigje se a ka pasur keqpërdorime, nga Prokuroria thonë se nuk e kanë marrë dokumentin.

“Raporti ende nuk ka arritur në Prokurorinë Publike. Obligim i institucioneve është që ta dërgojnë në përputhje me ligjet, e më pas i njëjti do të shqyrtohet në mënyrë të detajuar”, thonë nga Prokuroria Publike.

Nga Ministria e Drejtësisë pohojnë se raportin e kanë dërguar dhjetë ditë pas prezantimit publik, më 7 dhjetor dhe nuk e kanë të qartë se pse Prokuroria ende nuk e ka marrë. Pasi që Këshilli Gjyqësor e mori raportin, kryetari Zoran Karaxhovski, së pari tha se ka pritur shumë, e më pas deklaroi se ka dilema se a duhet ky raport të jetë me shenjën – material i besueshëm.

Ministri i drejtësisë, Bilen Saliji, për TV21, thotë se Raporti ka qenë me shenjën “material i besueshëm” që opinioni të sigurohet se Ministria vepron në mënyrë profesionale.

“Raporti u dërgua në mënyrë të rregullt deri tek të gjitha institucionet kompetente të cilat kanë autorizim ligjor të veprojnë pas rezultateve të arritura në lidhje me raportin. Për shkak se ingerencat e Ministrisë së Drejtësisë janë të kufizuara sipas rregullores gjyqësore, Ligjit për gjykata dhe kornizave tjera ligjore, unë kamë vlerësuar se për t’ju dhënë mundësi institucioneve kompetente i njëjti duhet të jetë i klasifikuar me qëllim që të mos lihet përshtypja se jemi të njëanshëm ndaj dikujt”, tha Bilen Saliji.

Grupi i kryesuar nga gjykatësi Llazar Nanev gjatë kontrollit të funksionimit të sistemit kompjuterik për shpërndarjen e lëndëve gjyqësore, erdhi në përfundim se në Gjykatën Penale dhe në atë Supreme në Shkup, disa lëndë janë shpërndarë nëpërmjet telefonit dhe direkt në dorë.

Sot mund të lexoni Shfletoni kopertinat