Xhaferi i përgjigjet Zaevit: Propozimi për pyetjet e deputetëve, pas zgjedhjeve lokale

Maqedonia

Xhaferi i përgjigjet Zaevit: Propozimi për pyetjet e deputetëve, pas zgjedhjeve lokale

Më: 18 gusht 2017 Në ora: 16:48
Kryetari i Kuvendit, Talat Xhaferi

Pas përfundimit të zgjedhjeve lokale do të realizohet ideja për pyetjet e deputetëve për kryeministrin Zaev. Për këtë do të sillen ndryshime në Rregullore, që deri tani kanë paraparë mbajtje të seancës së veçantë për pyetjet e deputetëve çdo të enjte të fundit të çdo muaji.

Kjo është përgjigjja e kryetarit të Kuvendit, Talat Xhaferi, pas kërkesës së kryeministrit që çdo javë të mbahet seancë me kohëzgjatje prej një ore, në të cilën do të dëgjohen pyetjet e deputetëve.

“Kuvendi në Rregullore e ka të rregulluar çështjen e pyetjeve të deputetëve, ndërsa ideja, gjegjësisht gatishmëria e Qeverisë për transparencë të plotë, ju siguroj se do të realizohet pas përfundimit të zgjedhjeve lokale”, thotë Xhaferi në letrën drejtuar Zaevit.

Sipas tij, transparenca dhe afrimi me qytetarët është detyrë e përfaqësuesve të zgjedhur nga qytetarët, të cilët qytetarëve jua kanë besuar sovranitetin.

Kryeministri Zoran Zaev para dy ditëve dorëzoi kërkesë tek Talat Xhaferi, që të mundësohet që gjatë çdo jave të paraqitet në Kuvend dhe të dëgjojë pyetjet e deputetëve në kohëzgjatje prej një ore.

Sot mund të lexoni Shfletoni kopertinat