Nënkryetarja e BDI-së, Teuta Arifi, shpreson që liderët e katër partive kryesore në takimin e 31 gushtit, do të bien dakord që zgjedhjet e parakohshme parlamentare të mbahen në fund të vitit.
Në një intervistë për Alsat-M, ajo flet edhe për zhvillimet në parti, rezultatet e ministrave të ri të BDI-së si dhe për situatën në komunën e Tetovës, të cilën e drejton prej tre vitesh.
“Normalisht që për BDI, ka qenë shumë e rëndësishme që prej arritjes së marrëveshjes vitin e kaluar e njëjta të respektohet, sepse ka qenë dhe vazhdon të jetë fjala për një marrëveshje katërpalëshe, dhe duke pasur parasysh faktin që datat e caktuara ishin pjesë e marrëveshjes edhe BDI ka qëndruar në pozicionet e atyre marrëveshjeve. Shpresojmë se si rezultat i asaj marrëveshjeje të arritur liderët e katër partive politike, më 31 gusht, do arrijnë që të bëjnë ashtu siç edhe parashihet që zgjedhjet parlamentare, para fund vitit të mbahen”, ka thënë Arifi.
Për ministrat e ri, sa mendoni se janë duke bërë mjaftueshëm, apo janë thjeshtë në fazë pilot deri pas zgjedhjeve? “Në fakt vendosja e ministrave të ri ka qenë vendim politik i BDI-së. Pra ka qenë një vendim që është marrë në nivelet e duhura partiake. Unë mendoj se ministrat e ri janë kompetentë, se në fakt mosha nuk është hendikep por është përparësi e tyre në këto situata të vështira. E di që nuk është e thjeshtë dhe lehtë të mund të mbani detyra në këto situata politike në të cilat janë gjendur ata”, ka thënë ajo.
