Ekspertët: Ligji lejon formimin e repartit special policor

Maqedonia

Ekspertët: Ligji lejon formimin e repartit special policor

Më: 13 korrik 2016 Në ora: 20:28
Ilustrim

Formimi i një njësiti special policor i cili do të punojë vetëm me urdhër të Prokurorisë Speciale është i mundshëm. Me një vendim politik në formë aneksi të Marrëveshjes “Përzhino” por edhe me ndryshim në ligjin për procedurë penale në Kuvend, mund të formohet polici e veçantë e cila do të veprojë në çdo moment kur të ketë nevojë Prokuroria Speciale Publike.

Policia dhe Prokuroria Speciale patjetër që do duhet të ndihmohen nga departamenti special prej ku do të burojnë urdhrat për bastisje dhe arrestimin e personave të dyshuar. Kështu ka deklaruar për TV Shenja, profesori Nazmi Maliqi i cili vlerëson se policia e tillë patjetër duhet të jetë nën ombrellën e Speciales e jo të Ministrisë së Punëve të Brendshme pasi rrezikohet profesionalizmi dhe veprimi i drejtë i policëve.

“Do të ishte shumë mirë që të gjendet alternative Brenda ligjit që të formohet edhe policia speciale. Deputetët, Qeveria, por edhe akterët që janë në bisedime, katër partitë por edhe partitë tjera opozitare që janë jashtë, duhet të gjejnë një modul që Maqedonia dalë ngadalë ta pranoj formën e protektoratit ndërkombëtar juridik”, ka deklaruar Maliqi.

Eksperti juridik Vladimir Pivovarov thekson urgjencën e formimit të një trupi të tillë pasi ekziston baza ligjore.

“Një orë e më parë të formohet reparti special në MPB i cili do të jetë nën kontrollin e Prokurorisë Speciale. Të mos ketë organizimin hierarkik nga struktura e tanishme e MPB. Që nga formimi i Prokurorisë Speciale duhej formuar një organ i tillë. Zonja Nuland tani shkoi dhe përsëri do të ketë obstruksione kundër formimit të një reparti të tillë. Ekziston mundësi ligjore nëse politikanët kanë dëshirë, vullnet të bëjnë ndryshimet e duhura në Parlament”, ka thënë Pivovarov.

Profesori Maliqi thotë se ekzistojnë policë që nuk kanë lidhshmëri me pushtetin që do ta kryenin detyrën speciale me ndershmëri.

“Nuk do ta fajësojmë policinë. Kemi polic të cilët dëshirojnë të jetojnë me ligj, me norma. Ata janë njerëz tanë, pa marrë parasysh se cilës përkatësi nacionale i përkasin. Por, e gjithë kjo varet nga partizimi i tyre që është i tepërt, kapja e shtetit apo edhe partizimi i shtetit nga partitë politike që e bëjnë koalicionin”, ka thënë Maliqi.

Nga ana tjetër Pivovarov propozon që në tavolinën e bisedimeve në Përzhino të vendoset edhe ideja për formimin e një reparti për mbrojtjen e dëshmitarëve të fshehur pasi ky element është jetik për hetimet që do ti bëjë Prokuroria Speciale. Kjo pasi dëshmitarët që do të vendosin të bashkëpunojnë me Prokurorinë Speciale duhet të ndihen të sigurt pasi po denoncojnë krim dhe korrupsion të nivelit të lartë që mund tu kushtojë atyre me jetë.

“Prokuroria Speciale nuk ka repart për dëshmitarët e mbrojtur. Kjo është një kategori shumë e rëndësishme për spastrimin e krimit të organizuar në nivel të lartë sikur ai në Maqedoni. Gjithmonë duhet të kemi nisje pragmatike në mënyrë që të mos ketë nevojë kështu ti zgjidhim punët hap pas hapi”, ka thënë Pivovarov.

Sipas ekspertëve juridik ardhja e Nuland është një moment kyç për hapjen e rrugës për formimin e këtij ekipi. Organizimi sipas tyre duhet të jetë në bazë të natyrës së krimit që do të hetohet, nëse ka të bëjë me krim financiar apo vepra të tjera penale.

Sot mund të lexoni Shfletoni kopertinat