Ekipi në programin për anti-korrupsion të USAID-it i implementuar nga Qendra Maqedonase për Bashkëpunim Ndërkombëtar dhe Transparencë- Maqedonia ka promovuar studimet e rasteve me rreziqe të korrupsionit, raporton Anadolu Agency (AA).
Qëllimi i këtyre studimeve është përmirësimi i politikave anti-korruptive duke analizuar situatat dhe denoncimin e rasteve.
Aleksandar Kolekevski i cili së bashku me Ana Çupeska janë autorë të studimit për Agjencinë e Komunikimeve Elektronike (AKE), iu referua Ligjit për komunikime elektronike, i cili, sipas autorëve ka hiper-rregullim dhe tendencë që të imponojë një procedura autoritare të cilat shërbejnë si mjet për legalizimin e aktiviteteve të jolegjitime edhe të paligjshme.
“Hulumtuam raportet vjetore të punës së AKE-së, edhe ata janë në korrelacion me raportet e Komisionit Evropian. Një nga veçoritë në punën e AKE-së është bartja e parave të tepërta në lëmitë që janë jashtë juridiksionit të saj, dhe kjo është njëra prej subjekteve të kritikës edhe në raportin e Komisionit Evropian. Përveç kësaj AKE-ja shpenzon miliona për reklama dhe ndoshta ky është rasti i vetëm në Evropë”, tha Kolekevski.
Si pjesë e studimeve të rreziqeve të korrupsionit, janë përmendur edhe rastet e konfliktit të interesit, kriza e refugjatëve dhe rreziku i shfaqjes së ryshfetit, korrupsionit dhe krimit të organizuar, si dhe analiza e punës së Komisionit shtetëror për parandalimin e korrupsionit.