Në kuadër të aksionit të policisë në mëngjesin e sotëm është arrestuar edhe kryetari i Gjykatës Themelore në Kumanovë, konfirmojnë burimet e prokurorisë kompetente. Përveç kryetarit të gjykatës janë arrestuar edhe 11 persona tjerë të dyshuar për fajde dhe krime të tjera.
MPB-ja ka konfirmuar operacionin e vazhdueshëm në Shkup dhe Kumanovë kundër anëtarëve të një grupi të dyshuar për trafikim të drogës dhe armëve, grabitje dhe dhënien e parave me kamatë.
Ndërkohë, Këshilli Gjyqësor ka mbajtur një sesion urgjent me kërkesë të Zyrës së Prokurorit Publik për krimin e organizuar dhe korrupsionit, dhe kanë deklaruar se kanë vendosur t’i merret imuniteti kryetarit të gjykatës.
Zyra e Prokurorit Publik për Krimin e Organizuar dhe Korrupsionit ka konfirmuar se do të bëjë një hetim kundër 12 personave, ku një person kërkohet për veprat penale komplot kriminale dhe shpërdorim të pozitës zyrtare dhe autoritetit, i cili i ka kryer si udhëheqës i një funksioni të lartë në Gjykatën Themelore të Kumanovës . Të 11 të dyshuar të tjerë ndiqen penalisht për vepra penale shoqërim kriminal, kamatë, kontrabandë të emigrantëve, etj. Për të gjithë 12 personat Prokurori ka propozuar masa paraburgimi.