Kryetari i Komunës së Gostivarit, Nevzat Bejta zgjodhi shkollën fillore të fshatit Forinë për të uruar nxënësit dhe mësimdhënësit e shkollave fillore dhe të mesme publike për fillimin e vitit të ri shkollor 2015 / 2016.
Nga klasat e filloristëve të rinj të cilët sot u ulën për herë të parë në bankat shkollore, kryetari Nevzat Bejta deklaroi se edukimi i gjeneratave të reja në kushte cilësore dhe proces të mirëfilltë edukativo arsimor, mbetet obligim i gjithë shoqërisë, duke kërkuar me theks të veçantë përkushtim maksimal nga kuadri mësimdhënës.
“Sot jam në mesin e fëmijëve që sot ulen për herë të parë në bankat shkollore, dhe sot kujtoj ditën e para shumë vitesh kur edhe unë kam shkuar për herë të parë në shkollë. Fillon një periudhë e re në jetën e tyre, fillon beteja e diturisë. Një betejë e përbashkët e fëmijëve, prindërve dhe mësimdhënësve të tyre. Ardhmëria e shoqërisë sonë varet nga edukimi i fëmijëve tonë. Ato nga sot fillojnë me diturinë dhe sa të jetë jeta e tyre do të jetojnë me këtë dituri, prandaj angazhimi jonë duhet të jetë i përbashkët dhe i domosdoshëm”, tha mes tjerash kryetari Nevzat Bejta, duke shtuar se Komuna e Gostivarit bashkë me institucionet qendrore dhe donatorët e ndryshëm maksimalisht janë përkushtuar në përmirësimin e kushteve mësimore në të gjitha shkollat fillore dhe të mesme.
Kryetari Nevzat Bejta tha se tashmë shkollat publike kanë marrë pamje krejtësisht të re dhe se shkollat e Komunës së Gostivarit janë dukshëm më të mira edhe në nivel republikan.
I pranishëm ishte edhe deputeti i zonës, Talat Xhaferi, i cili po ashtu përuroj nxënësit, prindërit dhe kuadrin pedagogjik për fillimin e vitit të ri shkollor.
Drejtori i shkollës fillore “Forina”, Ejup Nesimi theksoi se investimet e realizuara në këtë shkollë, shumica e tyre nga buxheti dhe me mbështetje të kryetarit të Komunës së Gostivarit, Nevzat Bejtta kanë mundësuar kushte solide për proces të rregullt edukativo arsimor për gjithë nxënësit e kësaj shkolle.
