Profesori i mirënjohur Abdulla Mehmeti ka shprehur shqetësime dhe alarmin për gjendjen e rënduar në Tetovë dhe improvizimet e pushtetit. Ai këtë situatë e ka përshkruar me rastin e “Ditët e verës kulturore të Tetovës”.
Ja se çfarë shkruan profesori Abdulla Mehmeti në rrjetin social Facebook:
Tetovarët, po të ishin me pak vetëdije, në vend se ‘Ditët e verës kulturore të Tetovës’ do të organizonin protesta pa ndalur me moton ‘Masakra humanitare e Tetovës’, kundër helmimit nga Jugohromi; në vend se ‘Rruga e ombrellave’, i tërë qyteti të shpallej ‘Qyteti i maskave’ mbrojtëse nga helmimi”, thekson profesori Mehmeti.
Sipas tij, vetëm 50 metro nga ,,rruga e ombrellave”, në drejtim të sheshit të qytetit, vazhdon të gjallërojë krimi më i tmerrshëm që mund t’i ndodhë një qyteti; ballë për ballë, në çdo 10 metro distancë është hapur një kazino, ndërsa para dyerve të tyre me qindra lypsarë ditë e natë qëndrojnë me fytyra të mavijosura, pa bukë e pa strehim.
“Kështu deri në theqafje do të përfundojë ky popull deri sa nuk e kupton se e udhëheqin njerëz injorantë që jetën e kuptojnë si lojë fati, aheng, përrallë. Tetovën që deri dje e kemi konsideruar qendër universitare dhe të kulturës, sot mund ta konsiderojmë si qytet i kazinove dhe kriminalitetit gjithfarësh. Kjo nuk ka ndodhur në asnjë kohë, nën asnjë regjim dhe nga asnjë pushtues. Turp, turp dhe vetëm turp…”, deklaroi profesori Abdulla Mehmeti.