Ora 11 e 30 shënoi fillimin e dialogut politik mes VMRO-së dhe LSDM-së.
Në fakt, procesi ka filluar me një takim vetëm për vetëm të përfaqësuesve të VMRO-së me tre përfaqësuesit evropianë dhe një orë më pas po kështu do të takohen edhe përfaqësuesit e LSDM-së.
Pas takimeve të ndara, pritet të zhvillohet takimi i përbashkët mes përfaqësuesve të dy partive politike.
Mediet maqedonase që kanë korrespondent në Bruksel, raportojnë se LSDM përfaqësohet nga zv.kryetarja Radmila Shekerinska, nënkryetarja Renata Deskoska dhe ish-diplomati Viktor Gaber, ndërsa VMRO nga Nikola Poposki, Nikola Todorov dhe deputeti Ilija Dimovski.
Qëndrimi i LSDM-së është se qeveria duhet të dorëhiqet që t’i hapë rrugën zgjidhjes së krizës, ndërsa VMRO-DPMNE kërkon që lufta politike të zhvillohet institucionalisht dhe LSDM të kthehet në Kuvend.
Dialogu po ndërmjetësohet nga eurodeputetët Richard Howitt, Ivo Vajgl dhe Eduard Kukan.