Pakënaqësia nga kontrollet e shumta të inspektorëve në lokalet ku shërbehet ushqim dhe pije, ka bërë që persona ende të paidentifikuar të dëmtojnë makinat e Drejtorisë së të Ardhurave Publike.
Gjatë natës së djeshme, janë shpuar gomat e 6 makinave të parkuara përpara godinës së DAP-it në Manastir.
Dyshimet janë se “hakmarrja” pason aksionin e kontrolleve në lokalet në Manastir, Prilep, Resnjë, Demir Hisar dhe Makedonski Brod.
Ky është incidenti i dytë këtë vit, pas atij në Ohër, ku persona keqbërës dëmtuan gjithashtu makinat e DAP-it.
“Këto incidente na bëjnë me dije se në ato zona ku ushtrojmë kontrollet, punojnë biznese që duam të shmangin tatimin, për ç’gjë do të rrisim kontrollet”, thuhet në deklaratën e DAP-it.
