Ministrja e Punëve të Brendshme Gordana Jankullovska konfirmoi nismën e Qeverisë për forcimin e rregullave ligjore në lidhje me posedimin e armëve të zjarrit.
Ajo vlerësoi se ka mjaft hapësirë për të zbatuar masa më të forta ligjore në segmentin e përdorimit dhe posedimit të armëve zyrtare.
Ministrja tha se Qeveria dhe të gjitha institucionet e tjera do të analizojnë ligjet dhe procedurat dhe më pas do të propozojnë zgjidhje në funksion të parandalimit të krimeve.
Nisma e tillë vjen pas dy vrasjeve të trefishta të ndodhur në një hark kohor prej vetëm 10 ditësh.
Që të dyja vrasjet janë kryer nga të punësuar të strukturave të sigurisë.
