Një vajzë 15 vjeçare nga Shkupi, e cila prej disa vitesh ka jetuar me prindit në Liezh të Belgjikës, ka shkuar në Siri, pasi e ka pranuar fenë islame, shkruan gazeta “Dnevnik”. Sipas gazetës, vajza 15 vjeçare është nisur në Siri, deri sa ka qëndruar për pushime në Shkup. Në Ministrinë e Punëve të Brendshme kanë konfirmuar se vajza është paraqitur si e zhdukur, por nuk kanë dhënë më tepër detaje.
“ Më 15 korrik në Shkup është paraqitur rasti i zhdukjes së një vajze. Fillimisht u shpall urdhër për kërkimin e saj në nivel lokal, kurse më pas edhe në nivel nacional. Jemi në kontakt të vazhdueshëm me policinë belge dhe po kërkojmë vajzën e zhdukur”, ka deklaruar zëdhënësi i MPB-së, Ivo Kotevski.
Vajza bashkë me prindit dhe motrën e saj ka jetuar në Liezh të Belgjikës, kurse për çdo vit kanë ardhur për pushime te gjyshja në Shkup. Sivjet kanë ardhur më 30 qersdhor, kurse më 15 korrik gjyshja e ka paraqitur vajzën si të zhdukur.
Ajo prej aeroportit të Shkupit ka fluturuar në Stamboll me pasaportën e motrës së vet 19 vjeçare. Disa ditë pas zhdukjes së papritur, vajza u ka shkruar një SMS prindërve të vet, përmes së cilës i ka njoftuar se nga krishterimi ka kaluar në islam, se gjendet në Siri dhe se është mirë. Prindit i ka porositur që të mos brengosen për të. Tani për tani nuk ka informacione të konfirmuara se pse 15 vjeçarja ka udhëtuar në Siri dhe nëse i është bashkangjitur ndonjërën prej palëve në luftë. Poashtu nuk janë siguruar informata se në cilën pjesë të Sirisë së përfshirë nga luftë civile, gjendet ajo.
