Ngacmimet seksuale që shkojnë edhe deri në abuzime brenda familjes janë rrëfyer në një histori tronditëse nga një vajzë shkodrane.
Ajo tregon për “ShkodraNews” se si në moshën 9-vjeçare është ngacmuar nga kushëriri i saj dhe traumën e pësuar ndër vite.
Rrëfimi i plotë:
Të gjithë fëmijërinë e kam kaluar më shumë në shtëpinë e gjyshes në një rrethinë të Shkodrës. Po ashtu edhe vëllezërit e motrat e mia, e të gjithë kushërinjtë e tjerë mblidheshim në shtëpinë e saj pas shkollës dhe rrinim atje derisa shkolla fillonte prapë. Luanim shumë. Po shumë krejt. Kam qenë shumë e afërt me djalin tim të tezes. Si një nga nipërit më të mëdhenj, e ndihmonte gjyshen të kujdesej për më të vegjlit. Por një ditë, teksa i isha ulur në prehër ai i tha tanve të largoheshin nga dhoma, duke thënë se kishte nevojë për qetësi nga zhurma e madhe që ne bënim. Por kur mbetem vetëm më puthi në gojë. Mbaj mend se isha vetëm 9 vjeçe.
Nuk bëra asgja, pasi mendova se ishte normale të silleshin kështu kushërinjtë. Kështu që e lashë të vazhdojë. Më merret dorën e nisi të më prekte dhe pjesë të trupit. Përsëri e lashë, sepse i pashë si gjeste që më donte shumë si kushërirë. Edhe pse më dukej e çuditshme që ai nuk bënte të njëjtën gjë me kushërirat e tjera. Madje ndjehesha e veçantë. Mendoj se kështu më ka bërë për rreth 1 vit.
Por një pasdite kur doja të flija më ndoqi në dhomën e gjumit dhe e mbylli derën. Pastaj u shtri në shtrat me mua e më kërkoi të heq të gjitha rrobat e mia. Ai ishte zhveshur si tani e mbaj mend skenën.
I thashë që në kurrë nuk ishim zhveshur për të fjetur. Nuk më shkonte mendja për keq se e para isha e vogël dhe e dyta e shihja si një vëlla të madh që kujdesej për mua. Por para se gjërat të avanconim gjyshja i bie derës e ai vishet shpejt e ma kërkon dhe mua të vishem shpejt dhe dolëm.
Di që gjyshja foli veç me të e prej asaj dite ai s’më ka prekur më me dorë.
I kam treguar motrave më vonë kur u rritëm dhe kanë qarë kur e kanë dëgjuar. Kanë të drejtë kur thonë që ai më ka ngacmuar seksualisht. Nuk i kam thënë kujt tjetër sepse edhe pse nuk i rri më afër, nuk dua të lëndoj gruan dhe fëmijët e tij. Tani për tani, mbështetja që kam marrë nga motrat e mikeshat e ngushta më ka dhënë besimin dhe guximin për të ecur përpara. Studiova psikologji për 5 vite e tani punoj me fëmijë. Madje isha gati edhe të ndaja makthin tim të fëmijërisë me botën, në mënyrë që fëmijët t’i mbrojnë nga grabitqarët seksualë që rrijnë brenda familjes.
