Shefi i diplomacisë serbe, Ivica Daçiq tha se kompromisi është i domosdoshëm për të ardhur deri te zgjidhja e afatgjate në procesin e normalizimit të marrëdhënieve ndërmjet Beogradit dhe Prishtinës.
Ai në një konferencë për media në Bruksel ku po mbahet faza e re e dialogut Kosovës-Serbi, ka pranuar se bisedimet janë të vështira dhe se dallimet e qëndrimit të palëve janë të mëdha.
Sipas tij, zgjidhjet e përhershme do të mund të ndihmojnë jo vetëm për pajtim, por edhe për paqen dhe stabilitetin, por edhe zhvillimin ekonomik dhe integrimet evropiane.
Daçiq: Dëshirojmë zgjidhje afatgjate
“Ne dëshirojmë të gjendet zgjidhja afatgjate, e cila bazohet në kompromis, i cili është i vështirë”, tha Daçiq duke mos specifikuar se çfarë nënkupton me kompromis si zgjidhje e problemit.
Daçiq tha se Beogradi në Bruksel mbron interesat shtetërore dhe nuk do të pranojë kurrfarë ultimatumesh, ndërsa shtoi se pala kosovare nuk dëshiron kompromis.
Daçiq: Çfarë duhet Serbia nëse keni zgjidhur gjithçka?
“Nuk më takon mua të flas për këtë, por ne duam të kemi marrëveshje të duhur për të dyja palët. Njohja e Kosovës nga Serbia nuk vlen. Çfarë duhet Serbia nëse keni zgjidhur gjithçka? Unë thjesht nuk e di se ku Prishtina do të anëtarësohet, në cilën organizatë ndërkombëtare, kur nuk keni vota të mjaftueshme dhe si do të bëjë përparim në integrimet e BE-së, kur pesë anëtarë të BE-së nuk e njohin Kosovën ", tha Daçiq.