Në Manastirin e Graçanicës sot është mbajtur liturgjia me rastin e kremtimit të 628-vjetorit të betejës së Kosovës.
Liturgjia është udhëhequr nga patriarku Irinej. Në këtë liturgji morën pjesë rreth 200 besimtarë nga Kosova dhe Serbia qendrore, ndërsa në mesin e të pranishmëve ishin edhe drejtori i të ashtuquajturës Zyrë për Kosovën Marko Gjuriq dhe princi Aleksandar Karagjorgjeviq. Rruga Prishtinë-Graçanicë kontrollohet nga Policia e Kosovës, e cila është vendosur në çdo njëqind metra, si dhe rreth vetë manastirit ku janë vendosur patrulla. Pas liturgjisë në manastirin Graçanica, patriarku Irinej do të marrë pjesë në shënimin e betejës së Kosovës në Gazimestan.
