Nga Brukseli nuk ka asnjë informacion se si ndërprerja e dialogut në mes të Kosovës dhe Serbisë pas arrestimit të Ramush Haradinajt do të reflektojë në integrimin evropian të Serbisë.
Kështu ka deklaruar shefja e ekipit negociator të Serbisë me BE-në Tanja Mishçeviq.
E pyetur nëse Serbia mund të shpresojë për hapjen e kapitujve të ri nëse dialogu në Bruksel nuk do të vazhdojë deri në muajin qershor, ajo ka thënë për mediat serbe se për Serbinë është kusht vlerësimi i asaj çka është bërë deri më tanin në procesin e dialogut.
Kuvendi i Kosovës ka miratuar një rezolutë gjatë muajit të shkuar me të cilën është pezulluar dialogu me Serbinë, deri në lirimin e kreut të Aleancës për Ardhmërinë e Kosovës, Ramush Haradinajt, i cili po mbahet nën masën e lirimit me kusht, në Colmar të Francës.
Ai u arrestua nga autoritetet franceze më 4 janar bazuar në një fletëarrest të Serbisë të vitit 2004.