Universiteti i Prishtinës ka ndarë mirënjohje për profesorin Shukri Fetahu nga Fakulteti i Bujqësisë dhe Veterinarisë, i cili tashmë ka arritur që të krijojë, regjistrojë dhe licencojë kultivimin e parë vendor të grurit, pas një pune 15 vjeçare.
Në ceremoninë në të cilën është nderuar profesor Fetahu, rektori i Universitetit të Prishtinës, Marjan Dema ka thënë se falë punës së profesorit Kosova tash ka varietetin e vet.
“Më lejoni me këtë rast që bashkë me Ju, gjithë komunitetin akademik të UP-së dhe gjithë qytetarët e Kosovës, të ndaj këtë gëzim me rastin e kësaj arritjeje shkencore nga profesori i UP-së. Tashmë Kosova, përmes Universitetit të Prishtinës dhe Prof. Shukri Fetahut, ka varietetin e vet. Këtu e tutje nuk kemi nevojë importi nga vende gjithandej porse kemi dhe duhet të kultivojmë varietetin tone kosovar të grurit”, është shprehur rektori.
Profesor Fetahu thekson se varieteti, i emëruar Dardania-1, karakterizohet me tiparet si potenciali i lartë gjenetik prodhues, përdorim më të ulët të normës së farës për mbjellje, rezistueshmëri më të mirë ndaj patogjenëve, cilësi më të lartë të glutenit (ngjitësit), sasi më të lartë të proteineve si dhe tipi i miellit Grupi 500 dhe grupi kualitativ A1/A2.