Ngritja e Zyrës Rajonale për Bashkëpunim Rinor (ZRBR) në Tiranë pritet të konkretizohet së shpejti, me ratifikimin në parlament të marrëveshjes përkatëse. E nënshkruar në Paris më 4 korrik 2016 nga kryeministrat e Shqipërisë, Bosnje dhe Hercegovinës, Kosovës, Maqedonisë, Malit të Zi dhe Serbisë, marrëveshja parashikon krijimin e ZRBR-së.
Misioni i kësaj strukture është të mbështesë shkëmbimet rajonale të të rinjve, ndarjen mes tyre të ideve, bazuar në vlerat e tolerancës dhe respektit për të drejtat e njeriut, si dhe angazhimin për gjithëpërfshirje dhe sigurinë.
Ngritja e kësaj strukture, si pjesë e “Procesit të Berlinit”, synon të mbështesë aktivitetet që inkurajojnë pajtimin, diversitetin dhe vlerat demokratike, duke pasur parasysh shpirtin e procesit të integrimit në rajon.
Vizioni për ZRBR-së është që të mbështesë një rajon me diversitet, ku të rinjtë janë të ndërgjegjshëm për të kaluarën dhe luajnë një rol aktiv në ndërtimin e një të ardhmeje më të begatë për shoqëritë e tyre.
ZRBR do të jetë një mekanizëm institucional me funksionim të pavarur për bashkëpunimin rinor ndërmjet pjesëmarrësve të Ballkanit Perëndimor. Struktura ligjore e ZRBR-së do të vendoset në Tiranë, në përputhje me legjislacionin shqiptar.
Buxheti total vjetor i ZRBR-së, për periudhën e parë buxhetore 3-vjeçare, do të jetë 2 milionë euro në vit. Gjysma e kësaj shume do të financohet nga pesë vendet dhe gjysma nga donacionet.