Avokati Arianit Koci e ka quajtur akt të turpshëm dhe të papranueshëm ndërrimin e emrit të një rruge në Prishtinë nga Radovan Zogović në Lorenc Antoni.
Koci përmes një postimi në Facebook ka thënë se Zogović ka qenë mik i shqiptarëve, duke shtuar se është obligim i shoqërisë që të respektohen pakicat.
Ky është postimi i plotë i Kocit në Facebook:
Radovan Zogović, miku i shqiptarëve!
Me shumë shqetësim e morra lajmin që rruga Radovan Zogović në Prishtinë - rrugë e cila e ka marrë emrin e poetit malazez i cili është dëshmuar si mik i jonë, është ndërruar pa ndonjë arsye nga ana e organeve komunale, me emrin e kompozitorit Lorenc Antoni.
Akt primitiv dhe i papranueshëm. Madje edhe fyes për ne, si popull demokratik që pretendojmë të jemi.
Duhet ta kuptojmë: kemi obligim ndaj pakicave; kemi obligim ndaj miqve tanë - madje, nuk keni nevojë me qenë hakmarrës ndaj askujt.
Kosova, është vend i shqiptarëve dhe i të tjerëve.
Kosova, pa laramani nacionale, nuk është vend interesant!
