Pacienti që është dërguar në Emergjencë për të marrë tretman mjekësor, pasi pësoi lëndim nga një plumb si pasojë e të shtënave me armë në sheshin “Zahir Pajaziti”, është jashtë rrezikut për jetë.
Kështu konfirmoi për KosovaPress Avdush Bajgora, mjeku kujdestar që është duke e trajtuar viktimën e incidentit të ndodhur sot rreth orës 21:00.
“Pacienti është i plagosur në regjionin lumbal në anën e djathtë. Është një plumb që i ka kaluar rreth vrimës hyrëse dhe vrimës dalëse. Nuk i ka atakuar organet, por është vetëm nënlëkurore dhe e ka prekur pjesën dhjamore. Pacienti është jashtë rrezikut për jetë”, tha Bajgora.
Ndërkohë, Policia e Kosovës vazhdon të hetojë rastin për të dhënë detaje të reja rreth incidentit me armë zjarri në shesh.
Identiteti i viktimës nuk është bërë i ditur ende.