Çmimi i arit të zi në tregjet ndërkombëtare kanë vazhduar rënien, edhe pse Irani nuk ka nisur ende të eksportojë naftën e tij, të çliruar tashmë prej sanksioneve ndërkombëtare.
Një fuçi prej 159 litrash kushton 55 dollarë, nga 110 dollarë që kuotohej përpara një viti. Në Nju Jork, nafta bruto mbërriti çmimin 48.52 dollarë për fuçi e rënie ka edhe Brenti i Londrës. Për ‘Wall Street Journal’, tkurrja e kuotimit të arit të zi gjatë muajit korrik i detyrohet disa faktorëve, siç është prodhimi i lartë i naftës argjilore amerikane, i gërshetuar ky me sasitë rekord të hedhura në treg nga të tjerë prodhues të rëndësishëm, siç është Arabia Saudite, apo edhe luhatjet në tregjet valutore ku ndikim të madh duket të ketë forcimi i dollarit amerikan.
Rënia e kërkesës në Kinë, në Brazil apo Rusi, ndikon gjithashtu. Rol kryesor sidoqoftë vazhdon të luajë mbiprodhimi amerikan. Nxjerrja e naftës në Shtetet e Bashkuara, përsërisin ekspertët, ka arritur sërish nivele tepër të larta, si në fillimin e viteve 70-të. Sa për “rrudhjen” e kërkesës, këtu ndikon dhe fakti që një sërë vendesh të industrializuara përdorin teknologji që harxhojnë më pak naftë dhe benzinë.
Kështu, në Gjermani, në gjysmën e parë të vitit 2015, ka pasur një rënie të harxhimit të benzinës në masën 2%, por kjo nuk ndodh në të gjithë botën. Parashikimet më optimiste për konsumatorët janë ato të njërit prej partnerëve themelues të Again Capital, John Kilduff, i cili thotë se po të vazhdojë trendi aktual i çmimit, deri për Krishtlindje, çmimi i naftës mund të ulet sërish në nivele rekord, e një fuçi mbase do të arrijë të shitet për 30 dollarë.
