Bin Laden kishte diçka kundër gjermanëve!

Lajme

Bin Laden kishte diçka kundër gjermanëve!

Më: 22 maj 2015 Në ora: 23:16

Ta detyrojmë të tërheqë trupat nga Afganistani, të bojkotojmë industrinë e automobilave, të frikësojmë gazetarët, por t’u mbushim edhe mendjen gjermanëve se jemi krah tyre.

Ta detyrojmë të tërheqë trupat nga Afganistani, të bojkotojmë industrinë e automobilave, të frikësojmë gazetarët, por t’u mbushim edhe mendjen gjermanëve se jemi krah tyre. Mos hapni diskutime për Izraelin e Palestinën, sepse janë shumë të ndjeshme! Këto janë disa nga porositë e ish-kreut të Al-Kaedës në lidhje me strategjinë e saj të operimit me shtetin më të fuqishëm në Europë, e cila dukshëm ngjan të jetë e ndryshme nga ajo e sugjeruar për SHBA-në

Përfaqësuesit e shërbimeve sekrete amerikane kanë publikuar më shumë se 100 dokumente, të cilat janë pjesë e materialeve të sekuestruara gjatë bastisjes së ndërtesës ku fshihej kreu i terrorit, Osama Bin Laden, gjatë aksionit për eliminimin e tij në vitin 2011 në Pakistan.

Materialet e shkruara, duke nisur që nga dita e mërkurë e javës në vijim, mund të konsultohen tashmë lirisht online në faqen e Drejtorit të Inteligjencës Kombëtare amerikane ( Office of the Director of the National Intelligence – shih: www.dni.gov). Por ajo që ka ngjallur interes të veçantë publik, përtej thirrjeve për të vrarë amerikanët në mbarë botën, është edhe një dokument që lidhet me Gjermaninë – e që ka të bëjë me strategjinë e AL-Kaedës në lidhje me të.

Disa media gjermane raportonin dje për disa nga pikat kryesore të raportit që lidhej me këshillat apo sugjerimet e ish-shefit të organizatës (deri në atë kohë, më e madhja në botë) terroriste për të arritur synimet që ata kishin në lidhje me shtetin më të fuqishëm në Europë.

Në të parashtrohen disa pika, si:

Synimi i organizatës terroriste: të detyrojë Gjermaninë të tërheqë trupat e saj ushtarake nga Afganistani. Për ta arritur këtë, Osama Bin Laden donte të përdorte shumë taktika. Sipas dokumentit në fjalë, ai arrin në përfundimin se një bojkot ndaj industrisë gjermane të automobilave do ta prekte veçanërisht fort atë vend.

“Në vitin 2008, Gjermania eksportoi mallra në vlerën e 955 miliardë eurove. (…) 40 për qind e ekonomisë dhe një e treta e të punësuarve të saj, janë të varur nga eksportet. Autoindustria është shtylla më e rëndësishme dhe në vitin 2008, ajo zinte 17 për qind të të gjitha eksporteve. Gjermania shihet si motor ekonomik i Europës”, thuhet më tej në “analizën” e Bin Ladenit.

Por nuk janë vetëm prodhuesit e automobilave ata të cilët do të prekeshin nga ky bojkot:

“Një bojkot ndaj autoindustrisë gjermane dëmton atë sikurse dhe industri të tjera të lidhura me të, si BASF, për shembull, koncerni më i madh botëror i industrisë kimike apo dhe sektorin e prodhimit e përpunimit të hekurit e metaleve, të dyja bashkë, sektorë të rëndësishëm në ekonominë gjermane. Një bojkot ndaj industrisë së automobilave gjermane, do të sjellë humbje të vendeve të punës, rritje të taksave e dëme të tjera. (…) Një efekt domino.”

Për të aplikuar këtë bojkot, Al-Kaeda donte të bënte për vete në fillim vende arabe, si Arabia Saudite apo Libia.

Më tej, në materialet e shkruara të sekuestruara nga amerikanët në vitin 2011, pohohet se: “Gjermania ka vuajtur nga kriza ekonomike, shitjet jashtë vendit kanë shënuar ulje. Ata shpresojnë për kompensim në tregun arabik dhe përqendrohen në disa vende që duan të investojnë shuma të mëdha – si Algjeria me 150 miliardë dollarë deri në vitin 2014, Arabia Saudite me 100 miliardë dollarë edhe Libia”.

Taktika e dytë e planifikuar e organizatës së terrorit, sipas dokumentit, është se: gazetarët duhet të frikësohen. Në këtë mënyrë, ata duhet të shtyheshin apo detyroheshin të shkruanin e të ushtronin presion në media për të arritur tërheqjen e Bundeswehr-it (ushtrisë gjermane).

“Nëse mediat do të kenë frikë, barrierat mes të vërtetës dhe njerëzve, do të thyheshin. Nëse ata do të kishin frikë për jetët e tyre, mediat do të shkruanin gjëra që njerëzit do t’i bënin të zgjidhnin ata të cilët do të merrnin vendimin politik për tërheqjen e trupave nga Afganistani.”

Në mënyrë eksplicite, në dokumente përmenden ish-ministri i Brendshëm, Wolfgang Schäuble, dhe shtëpia më e madhe botuese gjermane, “Axel-Springer”.

“Pas publikimit të karikaturave ofenduese ndaj profetit Mohamed në Danimarkë, ministri i Brendshëm gjerman asokohe u bëri thirrje të gjitha gazetave në vend t’i ripublikonin ato. Kjo ka rëndësi, pasi ai është ministri i Brendshëm i vendit me shtëpinë botuese më të madhe në Europë”, thuhet aty.

Në të njëjtën kohë, dokumenti na tregon se si Al-Kaeda bënte përpjekje për të parë apo rritur imazhin e organizatës në Gjermani. Ndryshe nga ç’pritej aty vihej në dukje për shembull se si nxitja e urrejtjes ndaj hebrenjve në Gjermani, duhej shmangur, pasi kjo temë nuk shihej me sy të mirë nga qytetarët gjermanë, e si e tillë, nuk do të jepte rezultat. Terroristët do të përqendroheshin vetëm në përpjekjet për ta detyruar Gjermaninë të tërhiqej nga Afganistani.

“Shmangni të flisni me gjermanët mbi hebrenjtë dhe Palestinën. Kjo në Gjermani është një temë shumë e ndjeshme dhe do ta dëmtojë çështjen tonë.” Grupimi terrorist besonte në fakt se në këtë mënyrë do të fitonte mirëkuptim e simpati ndër gjermanët për të arritur synimet e veta.

“Unë besoj se nëse pohojmë se ne po i qëndrojmë në krah Gjermanisë, vetëm atëherë do të ketë kuptim t’i nxjerrim ata nga Afganistani. Ata do ta kuptojnë pozicionin tonë, dashtë Zoti”, përmbyll ish-kreu i Al-Kaedës.

Zyra e drejtorit të Inteligjencës shpjegoi se materialet e publikuara ishin sekuestruar nga forcat speciale “Navy SEALS” në vendin ku u eliminua fizikisht Bin Laden, në Abbottabad të Pakistanit në maj të vitit 2011. Publikimi i tyre vjen pas një verifikimi tërësor nga ana e autoriteteve qeveritare amerikane, bazuar në një ligj që u miratua në vitin 2014.

Sot mund të lexoni Shfletoni kopertinat