Dhjetë motoçiklistë të bandës nacionaliste ruse “Ujqërit e Natës” nuk janë lejuar të hyjnë në Poloni, ashtu siç ishte lajmëruar më parë.
Motoçiklistët, që njihen edhe si banda e Vladimir Putinit, kishin në plan të kalonin kufirin dhe të mbërrinin në Berlin për të festuar 70- vjetorin e përfundimit të Luftës së Dytë Botërore.
Por qeveria polake tha se planet e tyre janë provokime.
“Ujqërit e Natës” janë subjekt i sanksioneve të SHBA për shkak të rolit aktiv në aneksimin e Krimesë nga Rusia.
Ata kanë ndihmuar edhe në rekrutimin e luftëtarëve separatistë pro-rusë në lindje të Ukrainës.
Ministria e Jashtme ruse u zemërua me vendimin e Polonisë.
Por disa media polake megjithatë thonë se më shumë se 200 motoçiklistë kanë hyrë tashmë në Poloni, përmes enklavës ruse të Kaliningradit.
Disa motoçiklistë polakë i kanë shoqëruar në rrugëtimin e tyre.