Policia e Kosovës ka arrestuar Predrag Vuliçeviqin të shumëkërkuarin e policisë serbe.
Arrestimi i Vuliçeviqit është konfirmuar nga zëdhënësi i Policisë Baki Kelani.
Sipas Kelanit dje policia ka zbatuar një urdhëresë të Interpolit për arrestimin e këtij personi.
Vuliçeviq është shpallur në kërkim nga policia serbe për vepra të ndryshme duke përfshirë edhe trafikun e drogës.
I njohur me nofkën “Pexha”, Vuliçeviq ishte strehuar për një kohë në Veriun e Mitrovicës ku ishte parë të merrte pjesë edhe në aktivitete publike.
Mësohet se Vuliçeviq tashmë është duke u mbajtur në paraburgim në Prishtinë dhe i njëjti të premten ose të shtunën pritet të dalë para gjykatësit të procedurës paraprake në Prishtinë ku do vendoset rreth ekstradimit ose jo të tij.
Për momentin Ministria e Drejtësisë së Kosovës nuk ka marrëveshje bashkëpunimi me Ministrinë e Drejtësisë së Serbisë rreth çështjes së ekstradimit të personave të kërkuar.
