Qeveria nuk ua ka vazhduar shtesat 12 prokurorëve specialë që kanë kompetenca ekskluzive për t’u marrë me krim të organizuar, terrorizëm, apo krime lufte. Pagat e tyre nga ky muaj do t’u dalin pa shtesat prej 800 eurosh që i kanë marrë nga viti 2011.
Vendimin për këto shtesa e kishte marrë Qeveria që udhëhiqej nga Hashim Thaçi.
Kësisoj, të ardhurat e prokurorëve të Prokurorisë Speciale do të jenë 1. 130 euro e jo 1. 816 euro si deri tash. Madje gati sa ata paguhen ekspertët që punojnë në këtë Prokurori. Ata marrin vetëm 110 euro më pak se prokurorët.
Kërkesa e Prokurorisë për buxhet shtesë për vitin 2015 është 210 mijë euro, shkruan sot Koha Ditore. Kryeprokurorja e Prokurorisë Speciale, Sevdije Morina, ka thënë për “Kohën Ditore” se ndalimi i shtesave për prokurorët do të ndikojë direkt në punën e Prokurorisë. Ajo ka thënë se edhe me shtesat që kanë marrë ka pasur vështirësi në rekrutimin e prokurorëve që merren me rastet më të rënda.
Në Qeveri kanë thënë se vendimi nuk është marrë akoma për shkak se është kërkuar të bëhen disa plotësime në kërkesë. Kanë thënë se buxheti shtesë do të jepet dhe se pagat me shtesa do t’i marrin në mënyrë retroaktive.
