Ministrja e Punëve të Jashtme të Kroacisë, Vesna Pusic, pohon se ekziston mundësia që ajo të kandidojë për postin e Sekretares së Përgjithshme të Kombeve të Bashkuara (OKB-së), nëse Këshilli i Sigurimit i OKB-së vendosi që në krye të kësaj organizate botërore duhet të vijë dikush nga Evropa Lindore.
“Ky opsion mbetet i hapur. Nëse kërkohet që kandidatët duhet të jenë nga vendet e Evropës Lindore dhe jo nga Amerika Latine - e cila gjë është e mundur - do të ishte një projekt interesant”, tha ajo për mediat kroate.
Pusic kujtoi se askush në historinë e Kroacisë nuk ishte kandidat për Sekretar të Përgjithshëm të OKB-së, duke shtuar se “do të ishte një nder për të që të udhëheq këtë organizatë botërore”.
Kujtojmë se mandati i Sekretarit të tanishëm të OKB-së, Ban Ki-moon, skadon në fund të vitit të ardhshëm.