Shefi i operativës në Policinë e Kosovës në stacionin e veriut të Mitrovicës, kapiteni Miodrag Lekiq, si dhe vëllai i tij, po ashtu pjesëtar i policisë në këtë stacion, Millan Lekiq, janë suspenduar nga detyra deri në përfundim të hetimeve që po zhvillohen në lidhje me rastin e vrasjes së policit Enver Zymberi.
Burime të KosovaPress-it bëjnë të ditur se ata janë suspenduar në afat të pacaktuar kohor mbi bazën e prokurorisë që nga data 25 shkurt, ndërsa u janë marrë dokumentet e udhëtimit dhe obligohen të paraqiten tri herë në ditë në stacion.
Sipas këtyre burimeve, ata janë intervistuar në cilësinë e të dyshuarve nga zyrtarë të EULEX-it, dhe përveç intervistimit, atyre u janë bastisur edhe shtëpitë - por nuk bëhet e ditur nëse është gjetur diçka që konfirmon prova të krimit në fjalë.
Zëvendës drejtori i Policisë së Kosovës për rajonin e veriut, Besim Hoti, ka konfirmuar për KosovaPress suspendimin e dy pjesëtarëve të policisë, por nuk ka dhënë detaje shtesë.
“Ata janë suspenduar nga Drejtoria e përgjithshme e policisë në Prishtinë dhe ata iu japin sqarime shtesë”, ka thënë Hoti.
Në anën tjetër, bastisjet dhe intervistimet e pjesëtarëve të Policisë së Kosovës janë konfirmuar edhe nga zyrtarët e EULEX-it.
“Me 12 shkurt 2015, Policia e Kosovës-Njësia e Hetimeve Rajonale të veriut ka kryer një bastisje me urdhër të gjykatës, lidhur me hetimet mbi vrasjen e Enver Zymerit”, ka thënë zëdhënësja e EULEX-it, Dragana Sollomon.
Ajo ka konfirmuar se dy persona janë intervistuar në cilësinë e të dyshuarve dhe përveç intervistimit, atyre u janë bastisur edhe shtëpitë.
Ndryshe, polici i njësisë speciale Enver Zymeri u vra me 26 korrik 2011 në pjesën veriore të Kosovës, gjatë operacionit të policisë për kthimin e kontrollit në pikat kufitare 1 dhe 31. /KP/
