Ministri i Mjedisit dhe Planifikimi Hapësinor, Ferid Agani, së bashku me zëvendëskryeministrin e Republikës së Kosovës, Branimir Stojanoviq, kanë vizituar Komunën e Graçanicës, me ç’rast u takuan me kryetarin e porsazgjedhur, Vladeta Kostiq.
Ministri Agani, u njoftua për së afërmi me problemet që ballafaqohet kjo komunë, me theks të veçantë për problemet që ndërlidhen me ministrinë që ai drejton.
Kryetari i Komunës së Graçanicës, tha se banorët e këtushëm ballafaqohen me problemin e ujit të pijshëm dhe rrjetin e kanalizimit, andaj kërkoi nga ministri Agani dhe zëvendëskryeministri Stojanoviq të angazhohen për zgjidhjen e këtyre problemeve.
Gjithashtu u bisedua edhe për procesin e legalizimit, ku ministri Agani u bëri thirrje që të respektohet ligji dhe afati i paraparë për legalizimin e të gjitha ndërtimeve.
Përveç Graçanicës, ministri i MMPH-së, Ferid Agani, vizitoi edhe fshatin Uglare, ku nga banorët u njoftua mbi procesin e shpronësimit të tokave që janë përfshirë në autostradë.