Dega e Lidhjes Demokratike të Kosovës në Ferizaj ka reaguar të hënën lidhur me zhvillimet e fundit në vend.
Në një komunikatë për medie të kësaj dege thuhet se protesta e së shtunës, e thirrur për të bërë trysni rreth shkarkimit të ministrit Jabllanoviq, degradoi në dhunë e vandalizëm ndaj ndërtesës së Qeverisë së Kosovës dhe ndaj pronave private të qytetarëve të Prishtinës.
Ky subjekt konsideron se organizatorët e saj, më shumë u përqendruan tek mundësia e rrëzimit të Qeverisë, se sa tek shkasi për të cilin ishte thirrur protesta.
"LDK e Ferizajt konsideron se fyerja që ministri serb Jabllanoviq u bëri nënave dhe qytetarëve të Gjakovës, tashmë paraqet vetëm shkasin e një vale të re të sulmeve të opozitës dhe qarqeve të tjera politike e klanore ndaj qeverisë së re," thuhet në komunikatën e degës së LDK-së.
