Trupat e katër burrave dhe dy grave, që i përkisnin moshës nga 50 deri në 70 vjeç, u gjetën sot të pajetë në luginën Queyras, në Alpet e Francës.
Personat ishin raportuar të zhdukur dje, pas një rrëshqitjeje masive bore dhe akulli. Pierre Besnard, prefekti i departamentit të Haute-Alpes, tha se "trupat e tre skiatorëve u gjetën gjatë natës duke gëdhirë e diela, ndërsa pjesa tjetër u gjetën këtë mëngjes”.
Të gjithë ishin shtetas francezë, dhe kishin shumë vite që merreshin me ski. Për t’i gjetur ata u vunë në përdorim një helikopter dhe qentë e shpëtimit, të cilët u nisën kur rreziku i ortekut kishte kaluar nga niveli 5 në 3.
Skiatorët u gjetën në një nivel prej 2500 metrash. Por ata humbën kontaktet dhe të afërmit e tyre dhanë alarmin. 17 njerëz kanë vdekur nga ortekët në Francë që nga fillimi i këtij sezoni, dhe numri po shkon gjithnjë e në rritje.
