Nju Jork - I ndodhur në SHBA- javën e kaluar, Dr. Nail Draga, drejtor i Qendrës Kulturore në Ulqin, si i ftuar në Konferencën e dytë ndërkombëtare, kushtuar shqiptarëve në Mal të Zi, e cila është mbajtur në Universitetin Oakland - Michiganit – paraqiti kumtesën "Shqiptarët në Mal të Zi në regjistrimet e popullsisë (1948-2011)", i dha një intervistë të posaçme gazetarit tonë Beqir Sina, ku ai fletë për konferencën, gjendjen e shqiptarëve në Mal të Zi, dhe se cila është sot pozita e shqiptarëve në Mal të Zi tetë vjet pas pavarësisë.
Autori i 8 librave ka marrë pjesë në shumë takime, tribuna, sesione, simpoziume dhe konferenca të ndryshme shkencore, nga fusha e gjeografisë, etnologjisë, historisë, ekologjisë dhe çështjeve të drejtave të njeriut brenda dhe jashtë vendit.
“Bota sot”: Cili është qëllimi i vizitës suaj këtu në SHBA?
Dr. Nail Draga: Isha i ftuar në Konferencën e dytë ndërkombëtare kushtuar shqiptarëve në Mal të Zi, e cila është mbajtur në Detroit. Konferenca u sponsorizua nga Departamenti i shkencave Politike dhe Enti i Studimeve ndërkombëtare të Universitetit Oakland, së bashku me disa shoqata shqiptaro-amerikane nga Nju Jorku dhe nga Miçigani. Në këtë takim jam paraqitur me kumtesën "Shqiptarët në regjistrimet e popullsisë në Mal të Zi(1948-2011)", ku kam trajtuar në mënyrë analitike pasaktësitë e tyre regjistrimeve sidomos sa i përket strukturës kombëtare të popullsisë, nga del se numri i shqiptarëve realisht ka qenë më i lartë se sa e ka paraqitur statistika zyrtare. Janë bërë krahasimet nga koha e monizmit dhe atë të pluralizmit, ku vërehen dallime të mëdha. Aspak më mirë nuk qëndron gjendja as me pjesëtarët e popujve të tjerë si serbët, boshnjakët, kroatët etj. Nëse analizojmë të dhënat nga regjistrimi i vitit 1948 dhe këtë të fundit del qartë se kemi pasur të bëjmë me regjistrime ideologjike dhe koncepte unitariste, duke e paraqitur këtë mjedis si homogjen në mënyrë artificiale, edhe pse ky ishte dhe është tani mjedisi më heterogjen dhe më multinacional dhe kulturor në Evropën juglindore dhe më gjerë.