Kryesia e PDK-së, në mbledhjen e vet shqyrtoi përgatitjet për mbajtjen e suksesshme të Seancës konstituive të Kuvendit të Kosovës dhe themelimin e institucioneve kushtetuese dhe shtetërore.
Kryesia e PDK-së i bën ftesë të gjitha partive politike parlamentare që të marrin pjesë në konsultën e ftuar nga Kryesuesja e Kuvendit, zonja Flora Brovina, në mënyrë që të arrihet marrëveshja për mirëvajtjen e rregullt dhe të suksesshme të Seancës konstituive dhe zgjedhjen e Kryetarit dhe të Nënkryetarëve të Kuvendit në pajtim me Kushtetutën, Rregulloren e Punës së Kuvendit të Kosovës dhe vendimin e qartë të Gjykatës Kushtetuese të Kosovës.
Kryesia e PDK-së ripërsërit gatishmërinë e saj për një marrëveshje gjithëpërfshirëse për qeverisje të përbashkët me partitë politike parlamentare dhe i bën ftesë spektrit politik që të heq dorë nga destruksioni dhe bllokimi i procesit të themelimit të institucioneve shtetërore.
Pas vendimit të Gjykatës Kushtetuese është sqaruar në tërësi aspekti kushtetues dhe legal i themelimit të institucioneve dhe kjo obligon të gjitha partitë politike që në mënyre të pashtyeshme t’i nënshtrohen këtij vendimi dhe të procedojnë në pajtim me dispozitat kushtetuese dhe ligjore.
Themelimi sa më i shpejtë i institucioneve shtetërore mbi bazën e legjitimitetit zgjedhor dhe parimit të legalitetit dhe kushtetutshmërisë, të sqaruar edhe me vendimin e Gjykatës Kushtetuese, është në interes të popullit dhe gjithë qytetareve të saj në rrugën e integrimeve europiane.
