Ngjarjet tragjike të ndodhura gjatë ditës së sotme në Koshtovë, Mitrovicë dhe ato të 27 gushtit në Dumnicë, Besianë, por të bëra publike dje në opinionin publik, janë padyshim pasojë e moszgjidhjes dhe zvarritjes për një kohë të gjatë të të njëjtit problem.
Teksa në deklarimet publike në vijimësi, përgjatë viteve, Ministri i Punëve të jashtme dhe ai i punëve të brendshme, po ashtu dhe Kryeministri e zëvendëskryeministrat reklamojnë pa kursim “marrëdhëniet fqinjësore”, çështja e demarkacionit të kufirit me Republikën e Serbisë mbetet plotësisht e pazgjidhur dhe e paadresuar.
Gjatë 2011, Lëvizja Vetëvendosje në Kuvend dhe në debatet publike me çdo mjet ka këmbëngulur se para çfarëdo hapi në raport me lëvizjen e lirë midis Kosovës dhe Serbisë apo masat e tjera në raport me kufijtë veriorë të Kosovës, është i domosdoshëm demarkacioni i kufirit me Serbinë.
Në vend të kësaj negociatorët e çështjeve teknike dhe më pas politike në emër të negociatave për interes të qytetarëve përfunduan në marrëveshje të reja të dëmshme, por lanë të pazgjidhur madje të rënduar situatën e banorëve, qytetarë të Kosovës në të gjithë brezin kufitar me Serbinë.
Për gjithë këto vite, qeveritarët e Kosovës nuk kanë mundur që të krijojnë as sigurinë minimale për këto zona, duke i lënë qytetarët tanë në mëshirë të xhandarëve të Serbisë. Ku shpesh banorët janë qëlluar më armë duke mbetur të plagosur e jo rrallë edhe të vrarë, siç ndodhi me dy viktimat më të fundit.
Njëkohësisht, kjo çështje dhe të tjerat që kanë mbetur plotësisht të pazgjidhura dhe të paadresuara, e ka lënë politikisht vulnerabël Kosovën përballë organizmave ndërkombëtarë në raport me akuzat e padrejta të Serbisë për incidente tragjike të cilat i prodhon ajo vetë, ata që bashkëpunojnë me të, apo ata që iu intereson situata e tensionuar në Kosovë.
Sot, si dhe në rastet e shpeshta të ndodhura me po të njëjtin arsyetim, xhandarët serb herë inskenojnë e herë kërcënojnë e herë edhe vrasin banorë të fshatrave që në mospasje të një vije të saktësuar kufitare gjendet përballë rrezikut fatal.
Nga ana tjetër, mbetet vërtetë problem i madh se si Policia e Kosovës nuk gjendet në këto zona, por gati në çdo rast, banorët që qarkullojnë në këto zona hasin me xhandarët serb e jo me Policë të Kosovës.
Duke dhënë ngushëllimet më të sinqerta për familjet e viktimave, i bëjmë thirrje Policisë së Kosovës, Ministrisë së Punëve të Brendshme dhe Ministrisë së Punëve të Jashtme të japin shpjegime të sakta se çfarë ka ndodhur dhe cilët janë përgjegjësit.
