Komisioni Evropian do të ndihmojë me 93 milionë euro Serbinë për kapërcimin e krizës me pandeminë e koronavirusit.
Këtë e ka bërë të ditur Komisioneri për Zgjerim i BE-së, Oliver Varhelyi, sot përmes një postimi në Twitter.
Komisioneri Evropian ka njoftuar se gjatë një bisede telefonike me Presidentin e Serbisë, Aleksandër Vuçiq i ka bërë të ditur edhe ndihmën e BE-së me mbi 93 milionë euro ndihma.
“Bisedova sot me Presidentin e Serbisë, Aleksandër Vuçiq. BE-ja qëndron pranë partnerëve të saj në ludtën kundër koronavirusit dhe do të ndihmojë Serbinë me mbi 93 milionë euro për nevoja të menjëhershme dhe për të zbutur pasojat socio-ekonomike të pandemisë”, ka shkruar Komisioneri për Zgjerim i BE-së.
Ndihmat për Serbinë do të ndahen në dy faza, 15 milionë euro përkrahje të menjëhershme për sektorin e shëndetësisë dhe 78.4 milionë euro përkrahje për rimëkëmbjen sociale dhe ekonomike.
