Artistët e Teatrit Kombëtar të Operas dhe Baletit bojkotuan provat gjenerale të koncertit “Stabat Mater”.
Vendimi erdhi pasi mbi 100 prej tyre u është refuzuar paga e muajit Qershor.
Në datën 4 Korrik ata duhet të tërhiqnin në bankë pagën, por në llogarinë e tyre nuk është derdhur asnjë qindarke.
Ata që e kanë firmosur kontratën, nuk kanë patur problem dhe janë paguar normalisht.
Përballë këtij problemi artistët i kërkuan Drejtorit të Teatrit Kombëtar të Operas dhe Baletit, Ilir Kerni arsyen e mospagesës.
Përgjigjja, sipas artistëve, ishte se për aq kohë sa nuk do të firmosen kontratat e reja individuale ata nuk do të paguhen.
Të gjendur nën presion, i gjithë komuniteti i artistëve që refuzojnë të firmosin kontratën individuale për aq kohë sa ajo shkel atë kolektive, i është drejtuar një studioje ligjore.
Sot përfaqësuesi i saj, avokati Spiro Dodobibaj ishte në skenë bashkë me ta.
Në përfundim 82 artistë firmosën këtë peticion ku kërkojnë zhbllokimin e pagave dhe shkarkimin nga detyra të Drejtorit të TKOB, Ilir Kerni.
Problemet në TKOB nisën në muajin Prill.
Artistët refuzuan te nenshkruajne kontraten e re inviduale, me pretendimin se ajo shkel nenin 171 të kodit të punës, kontratën kolektive dhe nenin 13 të ligjit për artin dhe kulturën.
