Pulla postare me fytyrën e këngëtares amerikane Janis Joplin shumë shpejtë do të lëshohet në qarkullim në SHBA, shkruajnë mediet amerikane.
Filatelistët, të pasionuar me vitet e 60-ta të shekullit të kaluar ndjehen jashtëzakonisht të lumtur. Pas një serie të pullave postare me figurat e legjendave të muzikës si Jimi Hendrix, Johnny Cash, Elvis Presley, Ray Charles dhe Buddy Holly, Posta Amerikane USPS ka vendosur që të nderojë ikonën e rokut, Janis Joplin (1943-1970).
Njerëzit të cilët qëndrojnë pas këtyre koleksioneve kanë premtuar se pullat e para me fytyrën e këngëtares së njohur do të përcillen me biografinë e saj dhe do të dalin në qarkullim gjatë gushtit.
Me stilin e saj unik të një hippi underground dhe me zërin e ngjirur mjaft karakteristik, Joplin e ka shënuar historinë e rokut dhe popit. Vdekja tragjike dhe e hershme në moshën 27 vjeçare, për shkak të konsumimit të heroinës, e kanë shndërruar atë në mit.
Fansat e saj, edhe më tej në numër mjaft të madh, tregojnë adhurimin ndaj artistes rebele e cila ishte para kohës në të cilën jetoi.
Drejtoresha e postës, Susan McGowan, ka shprehur kënaqësinë e saj për koleksionin e pullës postare të cilat u dedikohen pionierëve të rock’n’rollit dhe ka paralajmëruar rishtypjen e serisë së pullave postare me fytyrën e mbretit të rokut, Elvis Presley.
USPS ka në plan që serinë e ardhshme t’ia kushtojë një artisti tjetër të madh të skenës muzikore, James Brownit, dhe gjithashtu planifikon që të publikojë koleksionin që do t’i kushtohet adhuruesve të Jazzit.
