'Grupi i tritolit', zbulohen rolet e 6 të arrestuarve, nga 'eksperti' deri te...

Kronikë e zezë

'Grupi i tritolit', zbulohen rolet e 6 të arrestuarve, nga 'eksperti' deri te...

Më: 10 shkurt 2018 Në ora: 14:50
Geraldo Yzeirllari, Kristi Maxhari, Kristian Petani, Edmond Abazi, Gazmor Kokla dhe Ergest Lipo

Gjykata e Elbasanit la në burg të arrestuarit si anëtarë të grupi të strukturuar kriminal, për Geraldo Yzeirllari, Kristi Maxhari, Kristian Petani, Edmond Abazi, Gazmor Kokla dhe Ergest Lipo.

Hetimet për grupin që shiste lëndë plasëse për atentate ka çuar dhe një tjetër person në pranga, duke e çuar në gjashtë numrin e të arrestuarve. Ndërkohë, janë zbuluar dhe rolet e pjesëtarëve të grupit, ku 39-vjeçari Edmond Abazi rezulton organizatori i grupit.

Sipas burimeve nga Prokuroria dhe Policia, bëhet e ditur se Abazi, i riu nga Gramshi, cilësohet si kreu i këtij grupi kriminal, që merrej me shitjen e lëndës plasëse. Policia, gjatë kontrollit në banesën e tij, gjeti 82 kallëpe tritoli. Në bazë të hetimeve, për montimin e mekanizmit të plasjes së tritolit kujdesej Gazmor Kokla, 40 vjeç, nga Gramshi.

Ky i fundit cilësohej nga grupi si “eksperti”, pasi Kokla e ka mësuar këtë teknikë gjatë kohës që ka punuar në Uzinën e demontimit të armëve në Mjekës, disa vite më parë. Për zbulimin e grupit u desh dhe infiltrimi i agjentëve civilë, të cilët në disa raste kanë kryer blerje tritoli.

Nga kjo është mësuar se grupi negocionte me blerësit një çmim, që varionte nga 700 deri 1500 euro. Hetimet për këtë grup nisën pas dyshimeve se ishin përfshirë në trafik droge dhe armësh, ndërkohë që gjatë mbajtjes në përgjim u zbulua se në fakt, objekti i tyre ishte prodhimi dhe shitja e lëndës plasëse. Hetimet për kapjen e grupit kriminal kanë nisur 3 muaj më parë nga Prokuroria e Elbasanit.

Sipas Prokurorisë, një pjesë e sasisë së tritolit të sekuestruar do të shitej në Tiranë. Në pranga ranë dhe Geraldo Yzeirllari, 20 vjeç, Kristi Maxhari, 21 vjeç, Kristian Petani, 22 vjeç, të cilët kishin rolin për të gjetur blerës të mundshëm. Ndërkohë, i arrestuari i gjashtë është Erges Lipo, 30 vjeç, banues në Pogradec. Arrestimi i tij u bë në vijim të operacionit “Porosia” dhe akuzohet për veprën penale “Prodhimi dhe mbajtja pa leje e armëve luftarake, e municionit dhe lëndëve eksplozive, e kryer në bashkëpunim”.
Gjatë këtij operacioni, Policia sekuestroi 82 kallëpe lëndë eksplozive e dyshuar si tritol, 2 armë zjarri, 440 fishekë, 15 celularë dhe 1.5 kg lëndë narkotike kanabis sativa. Arrestimi i të akuzuarve u krye nga forcat e posaçme në disa ndërhyrje në Pogradec dhe në Gramsh. 

Pesë të arrestuarve u janë sekuestruar edhe 3 automjete, 15 celularë, si dhe sasi e konsiderueshme parash. Ndërkohë, Prokuroria e Elbasanit vijon hetimet për dokumentimin e plotë të veprimtarisë kriminale të të arrestuarve, si dhe identifikimin e bashkëpunëtorëve të tjerë të mundshëm.

Sot mund të lexoni Shfletoni kopertinat