Një 13-vjeçare nga Tirana ka tentuar të vrasë veten duke pirë një sasi të madhe medikamentesh si dhe duke prerë damarët e njërës dorë.
Mësohet se vajza me inicialet E.H, ka pirë dy pako paracetamol dhe ndërsa qëndronte e vetme në shkallët e pallatit ku banon, ka prerë damarët e njërës dorë me një brisk. Për fat të mirë, një fqinj ka mundur ta gjejë atë vetëm pak minuta pas veprimit, duke e transportuar menjëherë në spital.
Sipas raportimit të “Panorama” thuhet se shkaku që e çoi atë drejt flijimit të jetës ishte mospranimi i ndarjes së prindërve. Ata prej pak kohësh janë në procedurë divorci, ndërsa thuhet se e bija u ka kërkuar shumë herë që të mos ndahen.
Burime nga policia bënë me dije se momentalisht e mitura ndodhet në ambientet e pediatrisë së spitalit “Nënë Tereza” dhe gjendja e saj duket e normalizuar.
