67 kilogramë kanabis u sekuestruan nga policia shqiptare në bashkëpunim me atë greke, ndërsa tre shqiptarë ranë në pranga. Arrestimi i tyre u bë në vendin e quajtur Asproklisi të Igumenicës.
Policia njofton zyrtarisht se operacioni nisi pak pas mesnate nga Policia Kufitare e Sarandës, Livadhjasë e Qafë Botës.
Policia konstatoi tre persona të ngarkuar me çanta që po lëviznin në drejtim të Konispolit në sektorin e Piramidave 67-68 . Shërbimet e Policisë Kufitare janë vënë në ndjekje të tre personave.
Ndërkohë është njoftuar menjëherë Policia e Igumenicës Greqi, në lidhje me situatën ku duhej ndihma e Policisë Greke për kapjen e tyre, pasi tre personat duke përfituar edhe nga errësira po kalonin për në territorin grek.
Policia e Igumenicës ka organizuar shërbimet ku rreth orës 02:19, në vendin e quajtur Asproklisi të Igumenicës u kapën tre shqiptarët se bashku me lëndën narkotike.
B.K, 25 vjeç, banues në fshatin Metoq Bashkia Sarandë ishte shkëputur nga dy të tjerët me qëllim kontrollin e rrugës dhe në momentin e arrestimit nga policia, gjatë kontrollit fizik iu gjet 978 grame lëndë narkotike.
L.R, 28 vjeç, banues në fshatin Ninat Bashkia Konispol dhe A.K, 25 vjeç, banues në Sarandë ishin bashkë dhe kishin tre çanta shpine me pako me lëndë narkotike, gjithsej 66 kilogramë Cannabis Sativa.
Pas finalizimit të operacionit të përbashkët, rreth orës 07:30 të mëngjesit drejtuesi i operacionit i Policisë së Igumenicës ka telefonuar dhe falenderuar drejtuesin e operacionit të Policisë Kufitare, duke i konfirmuar se kapja e këtyre tre shtetasve nga ana e policisë greke u arrit fal bashkëpunimit dhe shkëmbimit të informacionit në kohë reale të dhënë nga ana e Komisariatit të Policisë Kufitare të Sarandës.