Ermal Kamberaj, 24 vjeçi i vrarë mbrëmë në Mitrovicë, është varrosur pasdite në varrezat e Shipolit.
Është varrosur pasditen e sotme Ermal Kamberaj, i vrari mbrëmjen e djeshme në lokalin “Check In” të Mitrovicës, të cilin e menaxhonte.
Kufoma e Kamberajt është kthyer edhe njëherë në familjen e tij për përshëndetjen e fundit, pasi i janë kryer ritet fetare në xhaminë e varrezave të Shipolit.
Në varrim kanë marrë pjesë një numër shumë i madh i qytetarëve.
Gjatë ditës, punonjës të lokaleve tjera hoteliere të Mitrovicës paralajmëruan mbylljen e objekteve ku ushtrojnë veprimtarinë e tyre të përditshme gjatë kohës së varrimit të Kamberajt në shenjë proteste për vrasjen e tij.
Lindrit Misini, pronari i ëmbëltores “Misini Sweets” tha për KALLXO.com se “Ermali edhe për ne, edhe për qytetin ka qenë shembull”.
Ermal Kamberaj vdiq mbrëmë në QKUK pasi sipas policisë u plagos me tre plumba.
Policia ende nuk ka arrestuar askënd për këtë vrasje.
