Një krim i mundshëm është parandaluar mëngjesin e sotëm në Tiranë. Në pranga është vënë një 46-vjeçar nga Shkodra, i cili kishte kërcënuar me armë një grua 42 vjeçe, kameriere në një lokal në bulevardin “Zogu i Parë”.
Paraditen e sotme nga efektivët e Komisariatit numër 3, është marrë informacion dhe konstatuar një konflikt, në ambientet e një lokali, në Bulevardin "Zogu i Parë", ku nga kontrolli i ushtruar është gjetur dhe sekuestruar një armë zjarri.
Në pranga në flagrancë është vënë Besnik Alija, 46 vjeç, banues në Shkodër. Ky person, në ambientet e një lokali, dyshohet se ka kanosur me një armë zjarri, 42-vjeçaren me inicialet Q. N., banuese në Tiranë, kameriere e lokalit.
Në cilësinë e provës materiale u sekuestrua një armë zjarri e llojit pistoletë e tipit "Zastava", me një krehër pa fishek.
Materialet iu kaluan Prokurorisë pranë Gjykatës së Shkallës së Parë Tiranë, për veprat penale"Prodhimi dhe mbajtja pa leje e armëve luftarake dhe e municionit" dhe "Kanosja".