11 persona janë arrestuar në flagrancë, një tjetër është proceduar në gjende të lirë dhe 29 persona janë shoqëruar për verifikim, në kuadër të aksionit "Chaos Party", të zhvilluar orët e fundit. Gjithashtu, është sekuestruar një sasi droge.
Specialistët e Seksionit të Narkotikëve në bashkëpunim me Forcën e Posaçme Operacionale dhe Skuadrën Shqiponja, të Policisë së Tiranës, gjatë 24 orëve të fundit kanë bërë kontrolle në lokalet e natës së Kryeqytetit, në zonën e ish-Bllokut.
Këto kontrolle janë kryer pas informacioneve dhe një pune intensive në bashkëpunim dhe me Prokurorinë e Rrethit Gjyqësor Tiranë, ku është arritur të dokumentohet veprimtaria kriminale dhe arrestimi në flagrancë i disa shtetasve për veprën penale "Prodhimi dhe shitja e narkotikëve" dhe "Përshtatja e ambienteve për përdorim droge", njoftojnë burime zyrtare.
Ne këto lokale, dyshohej se menaxherët e tyre krijonin kushtet e nevojshme për klientët e tyre që të konsumonin lëndë të dyshuara narkotike, lëndë të cilat shpërndaheshin nga stafi ose shpërndarës që hiqeshin si klient të këtyre lokaleve.
Të arrestuarit
Personat e vënë në pranga nga Policia e Tiranës, janë: 1. Andri Buxhuku, 46-vjeç, banues në Tiranë, Menaxher i lokalit, i cili akuzohet për përshtatje të lokalit për përdorim droge.
2. Geri Pogoni, 29 vjeç, banues në Tiranë, Menaxher i lokalit. Akuzohet për përshtatje të lokalit për përdorim droge.
3. Elton Murati, 34-vjeç, banues në Tiranë, "Klient" - Shpërndarës i lëndëve narkotike.
4. Dorjan Plaku, 26-vjeç, banues në Tiranë, i dënuar më parë për "Prodhimi dhe shitja e narkotikëve", "Klient" - Shpërndarës i lëndëve narkotike.
5. Oltion Bekteshi, 36-vjeç, banues në Tiranë, Menaxher i lokalit, Akuzohet për përshtatje të lokalit për përdorim droge.
6. Erjon Dobi, 24-vjeç, banues në Tiranë, "Klient" - Shpërndarës i lëndëve narkotike.
7. Redi Roshi, 25-vjeç, banues në Tiranë, përdorues i lëndëve narkotike.
8. Ermir Papadhimitri, 30-vjeç, banues në Tiranë, përdorues i lëndëve narkotike.
9. Emiljano Llupo, 22-vjeç, banues në Tiranë, Staf kamarier i lolalit, Shpërndarës i lëndëve narkotike.
10. Filip Fermanis, 31-vjeç, banues në Tiranë, Menaxher i lokalit, Përshtatja e lokalit për përdorim droge.
11. Arlind Kozeli, 36-vjeç, banues në Tiranë, DJ dhe bashkëpronar i lokalit, Akuzohet për përshtatje të lokalit për përdorim droge.
Në gjendie të lirë është proceduar Elvis Lufi, 36-vjeç, banues në Tiranë, përdorues i lëndëve narkotike.
Në cilësinë e provës materiale janë sekuestruar:
- 5 gramë lëndë e dyshuar narkotike e llojt "Kokainë"
- 3 gramë lëndë e dyshuar narkotike e llojt "Cannabis Sattiva"
- 20 aparate telefonike të markave të ndryshme
- 2 kanaçe inoksi (për ngrohjen e lëndës narkotike, me mbetje lëndë të dyshuar narkotike)
- 4 tuba plastik
Materialet procedurale iu kaluan Prokurorisë pranë Gjykatës së Shkallës së Parë Tiranë, për veprat penale "Prodhimi dhe shitja e narkotikëve" dhe "Përshtatja e lokalit për përdorim droge".