Policia e Tiranës ka dhënë detaje të reja në lidhje me plagosjen e një 29-vjeçari në zonën e ish-Ekpozitës në Tiranë.
Në fillim është raportuar në polici si një aksident në rrugën “Nikolla Jorgo”, ku më pas është zbardhur edhe gjithë dinamika e ngjarjes ku i plagosur rëndë ka mbetur Andi Mustafarai. Policia ka njoftuar se menjëherë kanë shkuar shërbimet e qarkullimit rrugor për të kryer veprimet e para hetimore por kanë konstatuar se te lokal “Merlin Monroe”, në verandën e lokalit dyshohej të ishte plagosur me armë zjarri një shtetas i identifikuar pak minuta më vonë si shtetasi A.M 29 vjeç banues Tiranë.
Shtetasi i dëmtuari ishte dërguar për mjekim të menjëhershëm në spitalin e Traumës Tiranë. Nga informacionet e marra në rrugë operative shtetasi A.M, dyshohet të ketë qenë lidhje e shtetasit Elton Çiços vrarë më datë 01 Maj 2016, person me precedent kriminal. Gjatë këqyrjes së vendit të ngjarjes janë konstatuar tre gëzhoja dhe dy predha, të cilat u sekuestruan në cilësinë e provës materiale. Shërbimet e Policisë dhe grupi hetimor po punon intensivisht për sqarimin e rrethanave të ngjarjes me qëllim identifikimin dhe kapjen e autorit.
