Si pasojë e reshjeve të shiut të rëna gjatë gjithë ditës së dje në qytetin e Laçit humbi jetën një 48 vjeçar.
Policia e Lezhës njoftoi se rreth orës 23:40 të mbrëmjes së të hënës si pasojë e reshjeve të dendura të shiut, në vendin e quajtur “Kodra e Bushit” në Laç, në një kanal ka gjetur vdekjen shtetasi Kol Menga, rreth 48 vjeç, banues në Laç – Kurbin.
Blutë e Lezhës informojnë se nga kryerja e veprimeve hetimore rezulton se ngjarja ka ndodhur në mënyrë aksidentale si pasojë e mbytjes në ujë .
Po ashtu policia njofton se në këtë situatë të krijuar nga reshjet e dendura të shiut , në Laç janë angazhuar forcat policore të Komisariatit të Policisë Kurbin në bashkëpunim me grupe të FNSH-së Shkodër me qëllim ndihmën në evakuimin e banorëve si dhe në çdo rast tjetër në nevojë.
Gjashtë familje janë evakuuar në Milot si pasojë e reshjeve të dendura të shiut, pasi banesat e tyre rrezikohen nga përmbytjet, ndërsa nga uji rrezikohet të përmbytet edhe nënstacioni elektrik.
Shirat e orëve të fundit në Laç sollën përmbytjen e 50 banesave dhe bizneseve pasi përroi që përshkon mes për mes qytetin ka dalë nga shtrati si pasojë e shirave të shumtë.