“Arrest me burg” është masa e sigurisë e dhënë për Arnold Kolën, personi që shkaktoi aksidentin në Kamzë, ku humbi jetën efektivi i policisë Ervin Haxhiaj.
Ky i fundit u aksidentua për vdekje në kohën që po patrullonte në këtë zonë bashkë me dy kolegët e tij Ismail Hoxha dhe Besim Voji, të cilët u plagosën.
Sipas policisë, 22-vjeçari po e drejtonte mjetin “Lexus” në gjendje të dehur, me test alkooli 0.57 për qind. Ndërsa shpejtësia e mjetit llogaritet të ketë qenë 130 km në orë.
Kola është arrestuar një vit më parë pikërisht në vendin ku kreu aksidentin tragjik. Atëherë drejtësia i dha atij një shans duke e dënuar me kusht për shkak të faktit se nuk kishte qenë herë tjetër i dënuar më parë dhe se po ndiqte studimet e larta. I riu doli para gjykatës për dy vepra penale atë të “Shkeljes së rregullave të qarkullimit me pasojë vdekjen” si dhe “Drejtim mjeti në gjendje të dehur”.